انت حزين

ليه دايمًا

كل ما بتحاول تمنع نفسك

م التفكير في الموت

تلقى سواد الليل مستفرد بيك

وتلاقي عنيك

شايفاك من تاني

وانت لوحدك

........

الظاهر إنك

محتاج تتفرج على أفلام الرعب

وتصرخ

وتشيل الماسك المتبسم من على وشك

وتكشر

تكشيرة كبيرة تنور صالة السينما

وتهز خيوط السجادة تحت صوابعك

كل ما بتحاول تلعب ضغط

وتطلع مش قادر

.....

انت لوحدك

اللي بتصحى لوش الفجر

وتعد خطاوي الناس

الماشية تحت الشباك

وانت لوحدك

اللي بتتحمل رغم سكوتك

حركة كل الناس حواليك

وتحاول تلقى مبرر لوجودك

كل ما تتغطى

وتفتح عينك

ماتشوفش

أو كل ماتتكلم

تلقى كلامك يتحول لسكوت متهور

وما حدش طايق يسمع له

فتروح ساكت

.......

أنا مش عارف

ليه

رغم الحزن

مش قادر تبكي غير جواك

وليه

بتدور على نفسك

جوه جيوب الشنطة

ما تلقاش

غير صورة بألوان باهتة

بس أنا عارف حالتك

عارف ليه بتشوف في الضلمة كويس

وليه بتسكّن جسمك

رغم الحركة الدايرة

ف كل مكان حواليك

.......

أنا عارف

إنت

حزين.