منظر البودى جاردات الجداد اللى جابوهم يقفوا امام كل جامعات مصر تقريبا بيفكرك ببودى جاردات الكايرو فيستيفال ولا مارينا فى عزها ولا حتى مداخل كارفور
والقصة ان الشركة اياها "فالكون" بتاخد زى ماهو منشور، بتاع 3 ونص مليون جنيه فى الشهر، عشان تحمى جامعاتنا من الولاد الوحشين المخربين بتوع المولوتوف والسنج والشماريخ والسيوف، وكمان من البنات الخروفات نسبة للاخوات بتوعات الالفاظ البذيئة ولا مؤاخذة.
المناظر القميئة اللى ياى بتاذى مشاعر الطلبة الحلوين الماطاطين المحترمين، ولا البنات الامرات بتوعات الجيب والمينى جيب والمتحررات من عينة الست اللى قالت لك الحج بطقوسه حاجة مقززة وبالذات الدبح ولمجرد ان واحد حلم فى كابوس انه يذبح ابنه اى والله، و الشركة اللى حتعلم اللى ماتربوش فى بيوتهم الادب على اصوله
هى كمان ليها اصول، وان اختلفت الاراء واحد بيقولك دى شركة اسسها بتوع الاستخبارات، وواحد تانى بيقولك لا ، دى شركة امن خاصة عادية جدا جدا، وتالت بيقولك انت مش عارف حاجة دى شركة وطنية جاية تعمل خدمة لله وللوطن ماشى يا سيدى، بس ما تقوليش انها الحل السحرى، للى حصل ولسه بيحصل ، وحيحصل فى الجامعة ويا ما جربنا الحل الامنى وما نفعش ، وجربنا الحرس الجامعى ، وما نفعش ومن قبل ده كله جربنا ومازلنا العصافير من طلبة الجامعة، وبرده ما نفعش طيب ايه الحل بقى، والسكاكين مسنونة بدرى بدرى، وفى اللى يقولك ، دول عيال مش متربية، ولازم يفصلوا فورا، ورئيس جامعة طالع فى اول يوم دراسى، وبيهتف تحيا مصر هو لا كده لا بلاش يعنى، ومذيع بيقولك نمنع الدعم ، عن اهالى الطلبة الوحشين، وواحد بيقولك نوديهم ، معسكرات الجيش عشان يتربوا بجد، وواحدة بتقولك ماهو احنا كنا طلبة، وطول عمرنا عارفين ان الجامعة للعلم بس,,لا يا ستى انتى ما بتقريش تاريخ الجامعة طول عمرها من ايام ثورة سعد زغلول، وهى مكان للسياسة، وكمان من ايام الملك ابو طربوش، والاحتلال البريطانى، وايام عبد الناصر، وهوجة الطلبة وحنحارب، ومن ايام السادات ، والطلبة الاخوان، واليساريين والشيوعيين، وكمان من ايام المخلوع مبارك، ولغاية دلوقتى ، والمفاجاة انها كمان مستمرة، الى ان يرث الله الارض ومن عليها مبسوطة ياست..
الحل ياسادة مش فى ده كله، ولا فى مطالبة راجل بيقولك نقفل جامعة الازهر لعامين ، والا حدث ما لا يحمد عقباه، هو اللى قال ، ولا واحد بيقولك اقفلوا، جامعة الازهر منبع التطرف نهائيا .
الطلبة يا سادة .. اولادكم واخوانكم واخواتكم، فلا تمنعوهم من ثورة الشباب ، حتى وان كانوا مخطئين، وبدل ما الاساتذة يبلغوا او يصوروا الطالب الفلانى ، ولا الطالبة العلانية حتى يتم فصلهم فورا، جربوا تستمعوا لهم، او تعطوا لهم خبراتكم بدلا من التفرغ لبدل الجلسات ،وفلوس الامتحانات ، والدروس الخصوصية، وارقامها الفلكية، ولا الخناقات الهايفة، بينكم وبين بعضكم جربوا تحنوا بجد على الطلاب، جربوا تؤمنوا بالراى والراى الاخر .
مش كل المخالفين والمتظاهرين اخوان ولا خرفان فى قول اخر، ومش كل الطلاب، من عينة اللى بيقولوا امين على طول الخط ، فى برده طلاب محترمين، ولاد ناس عندهم عقل بس مختلفين، وغير كده فى قانون بجد، نطبقه على المخالفين بس بالعدل ، ومن غير تصنيفات زى انت مش مع العسكر ، تبقى اخوانى عدو للوطن .
يا سادة لولا الاختلاف لفسدت الارض ومن عليها بس اللى يفهم ؟
##
