بيقولك السبكى وافلام السبكى واخواتها
هى اللى افسدت الذوق العام
وهى اللى جابت اخلاق وادب المصريين الارض
وبيقولك كمان ان افلام السبكى واخواتها
هى اللى علمت المصريين الطيبين المساكين
الكفت وابو الكفت وامه كمان
ومش كده وبس
وبيقولك كمان ان افلام السبكى واخواتها
هى سبب كل مشاكل
ورزالات وغباوات
وانتكاسات المصريين
وهى بكده السبب
فى البطالة والدعارة
والتحرش والزحمة
فى الروحه وفى الجايه
وهى السبب كمان
فى طوابير العيش
والبنزين والسولار
وازمات الميه
وهى اللى خلتنا
نفوق للواد بتاع السكينة اياها
واللى كان عمال بيققطع الكهربا
عمال على بطال
عاوز كمان
خد عندك يا سيدى
والسبكى هو اللى علمنا الافيه
وانك لو خايف
من بكره نام
واصحى بعد بكره
ليه ياسيدى
خليها عليك المرة دى
ولو خايف بجد زيك
زى معظم المصريين
نام بس قبل ماتنام
ادع ربنا انك لا
تصحى بكره
ولا بعد بكره
ريحه وريح السامعين يارب
وعلى راى واحد من السبكية الاصل
اللى عنده اهرامات زينا
حنقوله يا عمنا
جتنا ستين الف نيلة
وعليها كمان كذا مليون خيبة
على ايه ان شاء الله
على العز واكل الوز
ولا على الخير اللى مغطينا
من راسنا لساسنا
ولا على الراحة
اللى ما شفهاش حد من قبلنا
ولا بعدنا
ولا على ضرب القفا
ليل مع نهار
وبيع الميه فى حارة السقايين
ولا اقولك على الهم اللى ما بيتلم
وعذابات وقاذورات الشارع
واللى بييجى منه
اصحوا بقى
وبدل ما تشتموا
فى السبكى وافلامه واخواتها
فوقوا بقى
واعرفوا وقولوا
كلمة حق
السبكى مش اللى بالى بالكم
واللى طالع نازل
بيخمنا
السبكى يا سادة
ده
واحد مننا
