28 - 03 - 2024

محمد حليم بركات يكتب: حروب الجيل الرابع بين أبل والسيسي وسامسونج !

محمد حليم بركات يكتب: حروب الجيل الرابع بين أبل والسيسي وسامسونج !

حوار جديد دار في متحف شركة "فوكسكون" بين جهاز "الأيفون 6" و"النوت 4" على مرأى ومسمع من الموجودين في المتحف من أجهزة تتراوع أعمرارها ما بين أربعين يوماً وأربعون عاماً, من جميع أنواع الأجهزة الإلكترونية.

في عام 1974 بمدينة "تايبية الجديدة" التي تقع في وسط "تايوان" تأسست شركة "هون هاي" المحدودة للصناعات الدقيقة والتي تتداول تجارياً باسم "فوكسكون" وهي عبارة عن شركة صناعة بالوكالة عن ثلاثون شركة تنتج أجهزة إلكترونية وأكبر عملائها الأن هي شركة "أبل ماكنتوش" الأمريكية الأصل وشركة "سامسج" الكورية و"بلاك بيري"الكندية و"سوني وتوشيبا" اليابانية و "نوكيا" الفنلندية وغيرها من الشركات الأشهر على مستوى العالم.. وبسبب إنتاجاتها الضخمة قررت أن تستثمر العمالة الزهيدة في الصين لتنشأ أربعة عشر مصنعاً في معظم المدن الصينية, لتصبح أكبر شركة في العالم تمتلك مصانعاً في الصين.

من عادات الشركة أنها تحتفظ بأول قطعة تخرج من أول خط إنتاج لأي شركة من الشركات المتعاقدة معها والتي ترسل إليها تصميم أي منتج لتصنيعه.. وهذا يعني أن الشركة تمتلك متحفاً ضخماً من الأجهزة الإلكترونية منذ عام 1974 ومن معظم الماركات العالمية.

في مقدمة المتحف يوضع أحدث إصدارات شركة "أبل" وهو "أيفون 6" إلى جوار أحدث إصدارات "سامسونج" وهو "نوت 4" .. وتعتبر الشركتين التحاربتين هما الأقوى في العالم في مجال الهواتف المحمولة فأرباح أبل في الربع الأخير من العام الماضي بلغت 13 مليار دولار في مقابل 8 مليار دولار لصالح شركة سامسونج.. إنها حرب بما تعنيه الكلمة من معاني ودائرة بينهما منذ أكثر من عشر سنوات.. ويسميها المتخصصون حديثاً بحرب الـ"فور جي" أو الجيل الرابع.

بدأ الحوار عندما قرر جهاز "الأيفون 6" التعالي على جهاز "النوت 4" كعادته منذ الإصدار الأول له قائلاً:

ساكت ليه يا جهاز يا شعبي مش عوايدك.. طول عمرك ثرثارعلى الفاضي.. مالك بطاريتك فاضية ولا سماعتك إتحرقت؟

ضحكت الأجهزة المتناثرة على أرفف المتحف ومنها من استلقى على شاشته من فرط الضحك المتواصل.. فالتفت "النوت" يمينا إلى "السوني" ويساراً "البلاك بيري" وللخلف إلى "الموتورولا" ملقياً نظرة إشمئزاز بطرف كاميرته الأمامية, ثم تمتم قائلاً

بتضحكوا على إيه يا أجهزة مجهولة.. طيب إحنا كبار زي بعض.. إنتوا بقى ماحدش يعرفكم.

قاطعه "الأيفون" قائلاً:

لأ.. لأ.. ملكش حق.. الـ"سوني" ماسك نفسه وجاي ينافس بقوة وكفاية إنه الوحيد الي ضد المية.. ولا إيه ؟!

قال الـ"سوني" ممتناً على كلمات الأيفون":

تسلم ياكبير.. طول عمرك حقاني..وصاحب صاحبك.

تدخل "البلاك بيري" في الحوار قائلاً:

كل واحد بياخد زمنه وبيتنسي.. إسألوني أنا.. وبالمناسبة هي حرب الـ"الفور جي" الي دايرة بنكم دي مش هتنتهي بقى.. ده بيقولوا إنها إتنقلت مصر وبيسموها بالعربي "حروب الجيل الرابع".. صدقني بجد في "بلاك بيري" صاحبي قالي إن رئيس الدولة الي عايش فيها بيسموه "السيسي" كان بيتكلم في التليفزيون عن الموضوع ده.

ضحك "الأيفون" على ما سمعه قائلا:

شوفتوا الجاهل بيقول إيه؟! مهو عشان كده إنقرض.. حكاية "الفورث جينيريشن وار" أو حروب الجيل الرابع دي إخترعتها عندنا المخابرات الأمريكية في أواخر الثمانينات عشان يداروا على خيبتهم الي هي زي خيبتك كده في إنهم فشلوا في التعامل مع الحركات الإرهابية وعملياتهم الإرهابية الي بدأت في نهاية الثمانينات وأوائل التسعينات, وبدل ما يعترفوا بقصور تفكيرهم وإن الجماعات الإرهابية دي طورت من قدراتها وأفكارها الهجومية وسبقتهم.. عملوا النظرية الوهمية دي عشان يحافظوا على ماء وشوشهم العكرة الي زي وشك كدة.

تدخل "الموتورلا" في الحوار قائلاً:

وهي إيه النظرية المضروبة دي يا "أيفون" ؟

رد "الأيفون" ساخراً:

مش بقولكم إني خسارة واحد زيي مثقف يبقى وسطكم يا شوية جهلة.. ماشي هعلمكم يمكن أخد فيكم ثواب.. النظرية دي بتفترض أن الحروب إتطورت بالتدريج من استخدام القوة الجسدية والأسلحة البدائية الي هي "الجيل الأول"، وقوة النيران والأسلحة الأكثر تطور الي هي "الجيل التانى"، والحروب الخداعية زي الحروب بالوكالة كده الي هي "الجيل التالت"، لحد ما وصلنا لـ"حروب الجيل الرابع"والي بتفترض اتخاذ أشكال غير تقليدية من كيانات ملهاش علاقة بالدولة الي هي فيها زي منظمات وحركات إرهابية عشان تعمل فوضى داخلية.

أاااااه.. فهمنا.

هكذا ردت جميع الأجهزة في صوت واحد, وما كان من الأيفون سوى أن قال:

كدابين.. ومنتوش فهاهمين حاجة.. أصل انتوا لو فهمتوا بالسرعة دي ماكنش يبقى مصيركم كده كأجهزة العالم التالت.. زي دولة العالم التالت الي بيقول عليها "البلاكبيري" والي رئيسهم لسه مصدق الكدبة الي إتكشفت في أبحاث كتير, وواضح انه مبيقراش زيكم كده.. ولو انتو فهمتوا بجد كلموه وقولوله إن عظيم عظماء أمريكا الي هو "أنا" بيقولك الموضوع ده بلح.

هنا سمع صوت "النوت 4" مرة أخرى قائلاً:

طيب مهو ممكن رئيس الدولة دي فاهم إن الحكاية دي متفبركة.. وبيشتغل شعبه عشان يضللهم بالبحث عن المجهول, وميطالبهوش بأي حاجة تانية سوى إنه يخلصهم من الحكاية دي.

نظر إليه "الأيفون" متعجباً وقال:

تصدق.. قعدتك جانبي الكام شهر دول أثرت فيك وابتديت تشغل "راماتك" يا نوت.. شايفين يا جهله هو ده الفرق بينكم وبين "النوت 4" هو عنده إراده وعزيمة ومصمم يحافظ على مركزه التاني بعدي يعني.. إنما انتوا عاملين زي دولة العالم التالت الي عايشة على أساطير ماضيها.. كلامك مظبوط يا "نوت" بس ده ذنب المغيبين الي بيصدقوه.

فاق الـ"نوكيا" من غيبوبته قائلاً:

يعني مافيش حاجة إسمها حروب الجيل الرابع؟

ضحك الأيفون ضحكة شريرة قائلاً:

حمدلله على السلامة.. حروب الجيل الرابع بدأت وانت في الغيبوبة.. بدأت بين عيلتي وعيلة "النوت 4" الي جامبي ده من عشر سنين كده لحد ما سيطرنا على السوق بالتبادل ده قبل ما أديلة الضربة القاضية وأبقى رقم واحد, وعارف إن الحرب مستمرة وممكن يديني القاضية هو المرة الجاية.. زي ما حروب الجيل الأول كانت بينك إنت يا "نوكيا" وبين الـ"إيريكسون" وخسرتوها إنتوا اليتنين, وحرب الجيل التاني الي لسة دايرة بين "مايكروسوفت" وبين "ماكنتوش", وحرب الجيل الأول الي إنتهت بين الـ"الدوس" وبين الـ"أو إس تو".. وهي دي حروب الأجيال الحقيقية وأي كلام تاني عن حروب أجيال من نوع أخر يبقى زي ما قولتلك.. بلح.

##

مقالات اخرى للكاتب

 خلال لقاءه بالمرزوقي..  سفير قطر يؤكد أهمية التواصل الثقافي بين مصر والدوحة





اعلان