في المطار، بدأت الحكاية

لم يكن موعدا مرتبا، ولم يكن حوارا محددا سلفا. كان لقاء عابرا في مطار القاهرة الدولي، وتحديدا في صالة السفر، وكنت وقتها أعمل بمكتب الأهرام في المطار ولي باب ثابت بعنوان "على سلم الطائرة"، لكن معالي زايد لا تعرف العابر في التعامل. استوقفتها، كلمتها، فابتسمت كعادتها ابتسامة الكبار، وقالت ببساطة: "أول ما أرجع من السفر، نتقابل".

ووفت بوعدها.

بعد أيام، كنت عندها في بيتها الكائن خلف دار القضاء العالي، ودار بيننا أحلى حوار. حوار لم يكن حوارا صحفيا باردا، كان قعدة من القلب، حكت فيه عن فنها، وعن حياتها، وعن آخر مسرحية قدمتها وقتها، مسرحية "سكر زيادة".

رجعت بالحوار لمجلة "نصف الدنيا"، وشاءت الأقدار أن يقع في يد زميلنا الغالي عبد اللطيف نصار، مدير تحرير المجلة، الذي قرأه فقرر على الفور أن تكون معالي زايد هي نجمة الغلاف، واختار له عنوانا لا ينسى: "معالي زايد.. سكر زيادة"

في بيتها، لم تكن "النجمة"، كانت "معالي"

اللي يقعد مع معالي زايد في بيتها، يفهم على طول ليه الناس كلها كانت بتحبها. لا تكلف، ولا غرور نجوم. ست بسيطة، جدعة، بتتكلم من قلبها، وبتضحك من قلبها. خريجة تربية فنية، وبنت الفنانة آمال زايد، يعني الفن عندها مش شغلانة، ده تربية وبيت وعيلة.

في الحوار ده، كان الكلام كله حوالين المسرح. كانت وقتها راجعة من نجاح مسرحية "سكر زيادة"، اللي وقفت فيها على الخشبة جنب أبو بكر عزت وحسن حسني، وقدمت فيها كوميديا راقية، خفيفة، من غير افتعال. مسرحية خلت الناس تشوف وش تاني لمعالي، الوش اللي بيضحك وبيضحك، مش بس الوش التراجيدي اللي عرفوها بيه في السينما.

وكانت في 1995 في عز نضجها الفني. بعد "الشقة من حق الزوجة" و"البيضة والحجر" و"كتيبة الإعدام" و"السادة الرجال" اللي خدت عنه جايزة أحسن ممثلة، كانت واقفة على أرض صلبة. ممثلة تعرف تعمل بنت البلد الجدعة، وتعرف تعمل سيدة المجتمع الأرستقراطية، وتعرف تعمل الصعيدية القوية، من غير ما تحس إنها بتمثل.

عشان كده لما الحوار راح للمجلة، الأستاذ عبد اللطيف نصار مقالش "حوار كويس". قال "غلاف". لأن معالي في الوقت ده كانت تستاهل الغلاف، وكانت "سكر زيادة" هي العنوان الأنسب ليها، سكر زيادة في الفن، وسكر زيادة في الأخلاق، وسكر زيادة في حب الناس.

بنت بيت فني أصيل

معالي زايد اسمها الحقيقي معالي عبد الله المنياوي، اتولدت في 5 نوفمبر 1953 في حي السيدة زينب. والدها اللواء عبد الله المنياوي، ووالدتها الفنانة آمال زايد، وخالتها الفنانة جمالات زايد. يعني اتربت في بيت الفن بيتنفس فيه جنب الأخلاق والالتزام.

اتخرجت من كلية التربية الفنية سنة 1975، وبعدها كملت في المعهد العالي للفنون المسرحية، لأنها كانت عايزة الفن بعلم مش بالموهبة بس. وده بان بعد كده في كل أدوارها.

نجمة من طراز مختلف

بدأت مشوارها في التليفزيون، لكن السينما هي اللي خطفتها وخطفت بيها قلوب الناس. عملت أكتر من 80 فيلم، منهم علامات لسه عايشة لحد دلوقتي: "الشقة من حق الزوجة"، "البيضة والحجر" مع أحمد زكي، "كتيبة الإعدام"، "سمك لبن تمر هندي"، "السادة الرجال" اللي خدت عنه جايزة أحسن ممثلة سنة 1987، و"سيداتي آنساتي".

وفي التليفزيون، قدمت "دموع في عيون وقحة"، و"حضرة المتهم أبي"، و"امرأة من الصعيد الجواني"، و"ابن الأرندلي"، و"موجة حارة" اللي كان آخر أعمالها. كانت في كل مرة بتثبت إنها ممثلة تقيلة، تعرف تعمل التراجيدي والكوميدي بنفس الصدق.

المسرح والريشة

على المسرح، قدمت 6 مسرحيات من أهمهم "سكر زيادة"، و"زقاق المدق"، و"أنا والحكومة". وكانت تعشق المسرح لأنه المواجهة الحقيقية مع الجمهور، من غير مونتاج ولا إعادة.

ومالا يعرفه الكثيرين، إن معالي كانت فنانة تشكيلية بجد. كانت بترسم، وعملت معارض فنية، منهم معرض "الوجه الآخر" اللي قدمت فيه بورتريهات من روحها. الفن عندها كان في التمثيل وفي الرسم، في الكاميرا وفي اللوحة.

الست اللي فضلت سكر زيادة

معالي زايد رحلت عن دنيانا في 10 نوفمبر 2014 بعد صراع مع مرض سرطان الرئة، لكن اللي سابته أكبر بكتير من العمر. سابت رصيد فني يتجاوز 150 عمل، وسابت سيرة طيبة عند كل اللي قابلوها، صحفيين وفنانين وجمهور.

"واللي قعد معاها مرة واحدة، زي القعدة اللي كانت في بيتها خلف دار القضاء العالي، يعرف إن اللقب اللي اختاره أستاذ عبد اللطيف نصار مكنش مجرد عنوان غلاف، كان وصف حقيقي: معالي زايد.. سكر زيادة".