الشعر عندي حالة م الغليان
حروفه فوق الورق بتكتب الإنسان
مرة حالة سعادة ومرات كتير أحزان
بأكتب أنا بالقلم خوفا من النسيان
***
بأكتب لكل الناس غني وفقير
لكل واحد حباه ربنا بضمير
بيه يقدر يفرق بين الشرور والخير
وزي ما يحب نفسه كمان يحب الغير
***
بأكتب عن الشقيان وع الغلبان
بأكتب عن الصعلوك وع الأعيان
عن الأطفال عن الرجالة والنسوان
ماهو كلنا م البداية كلنا أنسان
***
الشعر عندي حالة م التعبير
لقيتني جوه الصف قبلي شعرا كتير
بأكتبه ببساطة كلام سهل ويسير
الحرف جنب الحرف واضح بدون تفسير
الشعر ده جواك بيطلع غصب عنك
مالوش علاقة بشكلك ولا بسنك
تلقي جيناته بتجري في دمك
تحكي عن افراحك وتكتب كمان همك
---------------------------
قصيدة: حجاج فراج
