أيوه.. المصريين والمصريات تخان سمان .. الواحد منهم أو منهن يوزن مية وألف.

تخان سمان .. من أكل المحشي، اللي من شوية خضار وشوية رز .. والحمد لله، وأكلة هنية تكفى مية.

تخان سمان.. أحيانا من الهم والغم اللي راكبهم وراكبهن.

ولو سألت أي طبيب نفسي عن أى واحد تخين سمين، هيقولك ده تنفيس عن الحزن والحالة النفسية اللي مش ولا بد .. واللي بيفرغها في الأكل والشرب.. وما يملا المعدة .. وينسي العقل بعضا من همومه .

تخان سمان.. من كتر القعدة علي الشلتة أو أمام التليفزيون.. لأنهم وببساطة لايملكون رفاهية الذهاب لنزهة.. تكلفهم شيء وشويات.. وهم يا مولاى كما خلقتني.. يادوب اللي جاي بيقضي مصاريف فواتيرهم وفواتيرهن.. ومطالب العيال اللي مبتخلصش .. وياريتها تكفى .. وياريته عاجب.

تخان سمان .. لأنهم وأنهن .. لايملكون ولايملكن رفاهية الذهاب لنادى أو لصالة من صالات الجيم.. ولا حتى حمام بلدى للمساج والتخسيس.. ولبس البوصة تبقي عروسة .. والذى منه.

تخان سمان.. راضين شاكرين حامدين.. ليل نهار.. ومش متبطرين علي النعمة حتى ولو كانت شحيحة في أغلب الأحيان.

تخان سمان .. لأنهم وأنهن راضيين بالهم والهم مش راضى بيهم وبيعايرهم ويعايرهن علي تخنهم وسمنتهم.. وكأن الكعكة في إيد التخين أو السمين .. عجبة.

تخان سمان.. بس العبرة لمن يضحك أخيرا، وسيضحك كثيرا.

ولو مش عاجبك تخنهم وسمنتم .. اوزن بره.
----------------------------------
بقلم: خالد حمزة
[email protected]