يقول جورج جالوى عضو مجلس العموم البريطانى أن إسرائيل إرتكبت خطأ فادحاً بنشرها صور مقتل السنوار فجعلته أيقونة المجاهدين الباحثين عن الحرية والمدافعين عن الأرض والعرض .. تماماً مثلما فعلت أمريكا مع جيفارا وأنا أقول لم يبق لدى إلا كلماتى البندقية كى أصوبها فى وجه المخنثين أصحاب حوانيت النخاسة وموالى دكاكين السياسة .
القصيدة
لما أنت ماشى كنت خدنى ف سكتك
مش كنت ناوى ع الكلام مين سكتك
يا عتمة الليل الطويل فين السبيل
دايماً بتفتح للصحاب كل الببان
شجرة تظلل ع الغلابة والجيران
يا هدمة الصيف للعرق
يا حلم تايه ع الشطوط
بيقاوح الموج والغرق
نرجع لمين ؟ كل الببان متقفلة
كل العيون متسبلة
طب قولى أيه باقى هناك
ياوحدك المزورع تعافر فى الخلا
طول عمرك العاشق لسورة الزلزلة
يا محلا صوتك لما تقرا البسملة
عمرك ما سلمت إلا وإنت فى الصلاة
قدرك تعيش إنت هناك
نفضل حزانى إحنا هنا
نجدل حبال الصبر
لأجل ما يعيش حلمنا
لأجل ما تعدى لنا يوم وتحل فيه المعضلة
لأهل السبح والدروشة
وأهل الليالى الدندشة
يا عايق الخال .. قل لى مين كان علمك
تغزل خيوط الحب جوه الشرنقة
تبعث لى مهرك بالحقيقة مزوقه
أجرى عليك ألقاك جسد
متدلى فوق أخر حدود المشنقة
والخلق كل الخلق .. عايشة مفرقة .. متخندقة
مين اللى باعك للشيطان
يا سبارتاكوس خانوا العبيد
ميت ألف أيد قابضة الثمن
أهو جه زمن قيصر ينام
والبهلوان فوق الحبال بيضحكوا
ويهوذا باعك وإستراح
كان ليه بقى طول السفر
لما الخلاص مرهون بلحظة رجعتك
لما الغلابة عطشانين تبل ريقهم قوللتك
وتقول لى أرجع طب لمين ؟
والعتمة دار والضلة نار
خلص الكلام والوشوشة
ناموا العيال من غير عشا
حسوا اليتامى بغربتك
يا رجعتك أشلاء بتنده بعضها
يا أم العيال زفى الكفن
متسبليش عين الولد
كل المشاهد جوه ننه مسجلة
حلم البلد .. ليه يا جدع
مش كنت حاسب حسبتك يوم الرحيل
مين اللى غواك بالسفر
حلمك لنا واللا إنت عاشق للخطر
ماتقولى فين يبقى الغلط
مين اللى غلطان فى الحساب
إنت .. أنا .. واللا اللى ماسكين القلم
ما تقولى مين فينا إتظلم
الحلم كان يمكن كبير
أو قد يجوز مش حلمنا
-----------------------
بقلم: سعيد صابر
