29 - 03 - 2024

قصيدة عبدالله صبري الأخيرة

قصيدة عبدالله صبري الأخيرة

رحل عن عالمنا أمس الخميس، الشاعر القنائي عبد الله صبرى، عن عمر يناهز 39 عاما ، فى مسقط رأسه بنجع الحميرات في قنا. وللشاعر الراحل أربعة دواوين، صدر آخرها عام 2021، ومنها "جناحات حديد" 2014، "دستور الحاجات" 2016. 

 آخر قصيدة كتبها عنوانها "آخر قصيدة شعر"، وكأنها تتنبأ بقرب رحيله، يقول عبد الله صبري في قصيدته:

آخر قصيدة شعر

هاكتبها

للقلقانين ع الشط

والمركب

والعطشانين من كتر

شرب الخوف

لعيال هتيجي بعدنا

بتشوف

وبتلتزم بالفوضى

والمسافات

تفهم وتكشف أي تعلب

فات

وتلففه مش تشتغل

لفات

آخر قصيدة شِعر يا محمد

ليك انت

واللي هيفضلوا صحابك

إرجعلها لو أي شئ

صابَك

هتشوفني باضحك

لما هتنادي

ما تقولشي بابا قول

يا عبدالله

علشان ما احسش

انك اتغيَّرت

وانك كبرت شوية

واتحيَّرت

قولها لحبيبتك وانتو

عـ الكورنيش

لو كان هيفضل عندنا

كورنيش

خالف كلام امك لكن

بشويش

وادخل معارك بس من غير

جيش

واكسب رضا واخسر

رغيف العيش

آخر قصيدة شعر

هاكتبها

لصحاب كتير يتلاقو

في التليفون

ويعلموك ان البعاد راحة

وأيدين في أنقى حالاتها

جراحة

للشعر لما خطفني من

روحي

للحلم لما اتسلى

بجروحي

للطيبين اللي شافونا

جزم

لما خالفنا الباشا

ويا الشيخ

للزهقانين اللي في شرم الشيخ

شكرا لكل مدينة

طردتنا

شكرا لكل سفينة

نسيتنا

شكرا لكل بداية

أنهتنا

شكراً لأهالينا اللي

شتمونا

شكراً لسيخ خاف يجرح

المونة

شكراً لكل وساخة التفاصيل

شكراً لزيف الجهد

والتحصيل

والشكل لما اتغابى

ع المعنى

آخر قصيدة شعر

باكتبها

لقلوب جميلة كانت

بتسمعنا

للفرق بين "هتساعنا "

و " اشمعنى "  

للنازفين ع الأرض والسماوات

لوشوش بتضحك بس روحها

موات

للزقزقة بالعند في الساكتين

للتين والزيتون والفجر / الضُحى

للغلب والتعب المقيم والرحرحة

للأضرحة

لكلام كتير قلته وانا

تحت الرحى

مشوار خفيف الوقت أتقل

م الهرَم

مشوار شفيف الوجد بطفولة

وهرَم

مشوار وكان يلزمله كام لحظة

كرَم

يمكن تكون البهجة عدت

جنبنا

واحنا اللي كنا وقتها

متنكرين

على كل حال متشكرين

متشكرين

متشكرين
.....................
عبدالله صبري






اعلان