من شغل العوج واللؤم والبكش ..الخلط اللي حاصل في موضوع الحجاب، المصطلح بتستخدمه كل الاطراف من اول الاسلاميين اللي فاهمين كويس ان قصدهم هو النقاب او الخمار مش الحجاب ، ولغاية البنات اللي بتقصر الشر وترمي طرحة على شعرها علشان تعرف تتعامل مع المجتمع او حتى عن قناعة وتأثر باللي بتسمعه صبح وليل .

هو اصلاً المصطلح ده مكانش موجود في كلام المصريين لغاية نص السبعينات كده وظهور الكائنات الاسلامية بمختلف أسماءها في الجامعات والشوارع، كانت اغلب الناس بتستخدم مصطلح طرحة للاشارة للحاجة اللي الست ساعات بتحطها على راسها ، وده كان في اغلب الاحوال قاصر على الستات الكبار في السن من الريفيات سواء مسلمة أو مسيحية مكنش فيه فرق..

اتفاق اجتماعي عادي على لبس معين، مالوش علاقة بالدين من أصله، زي ما الرجالة في الارياف كانت بتحط حاجة على راسها اتنوعت بين الطاقية والعمة واللاسة واللفحة واللبدة والى اخر المسميات المختلفة لغطا الراس في القرى.

حرامية وسماسرة ومتأسلمين

من بعد حرب أكتوبر وانبطاح السلام ... والمجتمع بيتعرض لتغييرات كتير جداً جداً كلنا عارفينها ..ومش مجالها..أهم التغيرات اللي حصلت في رأيي ان البلد بقت تتعامل كدولة وناس مع متغيرين جداد خالص

الحرامية أو الهليبة أو السماسرة ، وينفع نحط تحت المصطلحات دي كل اللي قلبك يحبه من الطبقة اللي افرزتها الهزة الساداتية المباركة

والمتأسلمين بكل أطيافهم ..من اول الجماعات والجهاد اللي استخدموا الجنازير والمطاوي علشان يظبطوا اداء الجامعات والشوارع على مقاس اسلامي جديد ..ولغاية الاخوان والسلفيين ( زمان كان اساميهم مختلفة زي التبليغ والدعوة وانصار السنة مش محطوطين في لكشة واحدة  اسمها السلفيين)

في وقت كانت أعصاب البلد بترخي واليأس بيملا روحها ..بقت اغانيها وافلامها وانتاجها الثقافي عموماً شبه اللي بيحصل ..

في الوقت ده  مصطلح الحجاب موجود وبيستخدم .. وبيتقال عن اللي لابسة طرحة (محجبة) ..وبعد ما كان أقصى حدود التحفظ في اللبس للستات انها تطول الفستان او الجيبة لتحت الركبة وتلبس (أبونيه) ..اتغير الموضوع وبقى الحجاب معيار للتقييم ، وبقى عندنا زي الأخ الملتزم ..فيه الاخت المحجبة ماشاء الله عليها ..

ومعيار التقييم اتمدد واتوسع ..

والفستان والجيبة بقوا عباية ..

والطرحة بقت خمار أو نقاب ..

واللي مش عاجبه بيتحول لهدف لغاية مايتوب ..

حجاب – خمار – نقاب – شادور

الخدعة استمرت بالاصرار على استخدام مصطلح حجاب بدون تفريق بين الحجاب والخمار والنقاب رغم انهم 3 حاجات مختلفين ..

الحجاب ( الطرحة يعني ) غطا راس عادي بقت تلبسه اغلب البنات والستات ، تأثراً بثقافة استشرت في المجتمع أو اتقاء لشر نفس المجتمع أو استجابة لأوامر وتوجيهات الزوج أو الاب او الاخ او الابن اللي همه بيحكموا المجتمع..

واللي استمرت من غير تأثير وفضلت بشعرها ، إما مسيحية مكنش ينفع تلبس طرحة طبعاً تحت أي ظرف ..أو بنت من أسرة مرتاحة شوية والمجتمع مش كاسر عينها بحاجة ..أو مثقفة ولها شخصية وفاهمة حقيقة الموضوع وعندها من القوة  والاستقلالية اللي يساعدها تلبس او ماتلبسش ..

هنا الحجاب مجرد طقس اجتماعي نتيجة تغيير حصل في مجتمع عامل زي توب مليان خروم ..ودخلت عليه الرياح من كل خرم لغاية ماغيرت ملامحه بمرور الزمن ..

اللي يئس واللي استسلم بمزاجه واللي استثمر الوضع واللي انساق عن اقتناع وهكذا..

وطبعا قليلين اللي عرفوا يجاهروا برأيهم ويقولوا ان الحجاب مش فريضة أو ان الغنا والفن عموما مش حرام ...وأغلبهم دفع التمن

خاصة وان الحجاب بقى فرض ضمن باكيدج واحد للاسلام ..ورفضك ليه بيحطك في قايمة الاتهام بحاجات كتير ممكن توصل للتكفير زي ماحصل وبيحصل

كمان الخلطة العجيبة اللي حصلت بين مجتمع محافظ بطبعه مع شوية توابل واضافات جاية من السعودية وشوية تاني مع افكار اسلامية نبتت وترعرت وكبرت لغاية ما غطت الحيطان والاسقف ...كانت نتيجتها ان البنت او الست اللي تفكر ..تفكر بس انها تخلع الطرحة بتتهم في اخلاقها قبل دينها ...وبيتهم الراجل القريب منها سواء زوج أو أب باتهامات ابشع اذا كان موافق على اختيارها ..

مين يقدر يواجه الاتهامات دي اصلا ؟

في مجتمع اغلب سكانه عايشين بين حيطان لازقة في بعض وخصوصيتهم شبه معدومة ؟

لكن الخمار والنقاب ( والشادور في بعض الحالات )مكانش ولا هيكون طقس اجتماعي خالص..

ده زي بتلبسه واحدة متصنفة سياسيا ودينيا ..

تمام زي الجلابية القصيرة والبنطلون ( القصير برضه) والسواك والدقن مع الشنب المحلوق ..

ده موضوعه مختلف كتير عن الحجاب ..لكن الاهم ان النصابين بتوع حجابك يا اختاه بيتكلموا عن النقاب والخمار ..مش الحجاب اللي شايفينه حرام اصلا وكشف للعورة والخ الخ

لكن علشان يبيع وينتشر ويلاقي ودان تسمعه بيستخدم المصطلح العادي (الحجاب) علشان الناس ماتنفرش في اول الكلام او جر الرجل .

وهو في النهاية بيكمل مراحل نشر دعوته لغاية مايوصل للنقاب الاسود في اسود ده اللي بيحول الواحدة لعفريتة ماشية على الارض تخب في هدومها حرانة زهقانة ومش عارفة تتنفس ..

وهم مفهمينها انها كده بعدت عن اثارة شهوة سيدها الراجل ، وهي مابعدتش ولا حاجة ..لأن الاخ ابو شهوة بتطلع في الشارع والمواصلات ده ولا بتفرق معاه محجبة ولا منقبة ولا لابسة جبس اصلا .

والمسكينة في كل الأحوال ماتقدرش ترفض ولا تعترض ..لأن الآمر الناهي اب او زوج او اخ ..وغالبا هو المتحكم في أكلها وشربها وعيشتها ، حتى لو بتشتغل ومعاها دخل ، وبالتالي سلطة القوامة اللي بتتبعها اي شروط لازم تتنفذ بمنطق انه المسئول وهو الاحق واللي شايفه صح وفي مصلحتها.

ومش مناسب نتكلم عن موضوع الايمان بان ده فرض وانه كده بينفذ تعاليم الاسلام ، لأنه في اغلب الاحوال لما بيتزنق بيتكلم عن منظره قدام الناس وهيقولوا عني ايه لما يشوفوكي مش ملتزمة..

والخيط يكر لما يوصل لفرص الجواز الاغراءات الرخيصة اللي بيقنعوا بيها البنت ان الشاب بيدور على واحدة مؤدبة تصون عرضه وتبقى ام عياله ...

وبالتالي تتنقل من سلطة قهر في بيت ابوها او اخوها لسلطة قهر اكتر قسوة في بيت جوزها ..

وهكذا

ليه حلا شيحة ؟

رغم ان حالات خلع الحجاب او النقاب او الخمار زادت من بعد ثورة يناير العظيمة ، تأثرا بحاجات كتير ايجابية ..لكن موضوع حلا شيحة خد أهمية كبيرة في الايام اللي فاتت ..

لأن حدوده مش بس حالة الفرحة والراحة اللي حس بيها المعسكر العلماني ( اذا جاز التعبير يعني ) والهزيمة اللي حس بيها الظلاميين عموماً ..

وبعيد عن انها لابتعرف تتكلم ولا تتعامل مع الموضوع سواء بنقابها او بشعرها ..( وبعيد عن وجود أبوها في المشهد أصلا)

لكن  واضح ان حلا كانت طرف أو شاهدة على حاجات كتير مهمة حصلت فترة وجودها معاهم..

 وانها كده طير وفلت من القفص وهيحكي باللي شافه وهيفضحهم...

ردود افعالهم الغريبة والهايجة دي مالهاش مبرر..

اصل مش الغيظ وحده اللي ممكن يلم الشامي على المغربي كده..

اخوان على سلفيين على دواعش ..على جمهور زايط في الزيطة وخلاص

ولسه كورة الجليد بتتدحرج وتكبر

وكأن قائدة اسلامية صبأت مثلا وانضمت لصفوف الاعداء

مش مجرد انسانة عادية قدرت تاخد قرار انها تخلع النقاب وتكمل حياتها زي ماكانت.

منهم مثلا : الدكتور حازم شومان ( داعية سلفي ) - محمد الصاوي، مستشار حازم صلاح أبو إسماعيل (صاحب فيديو البكاء المشهور ) وصديق زوج حلا الكندي يوسف هرسن - خالد الحداد (مقدم برنامج غير حياتك على قناة  الناس) - أميرة عزت (داعشية متجوزة من محمود المصري السلفي الهربان في لندن  وبتعرف نفسها بأنها داعية إسلامية ويقال انها بنت محمود عزت القايم بأعمال مرشد الإخوان) - ا أحمد الباز (صاحب صفحة  قطوف من الـask) – سامح عبد الحميد ( واحد سلفي طلع مع وائل الابراشي ) – ايات عرابي ( الاخوانية الهربانة ) – خديجة بنت خيرت الشاطر – عبد الحميد قطب ( سلفي ) ...ودي مجرد عينة طبعاً.
 ------------------
بقلم: خالد الدخيل