أحبه وأعشق نظراته الباسمة . وتفاؤله الشديد بالمستقبل
وأرى فيه عظمة محمد على . وشموخ عبد الناصر
وكبرياء السادات
ووطنية مبارك
رغم ما قالوه عنه من أنه باع البلد . تسليم مفتاح
هو وبطانة . وشلة
مراته . وعياله
وأحب المعلم محلب .. أخر حاجة
وأرى فيه همة
البنائين العظام من : عينة عثمان أحمد عثمان
وأصحاب مقولة
من هد وجد
وأحب كل وزير. وكل محافظ . وكل موظف كبير كان .. أو صغير
فى وزارة المعلم محلب
وأحب الجيش
وأعشق .. رجال الشرطة
الذين حموا مصر. والمصريين
من مصير سوريا . والعراق
وكمان ليبيا
واليمن .. فى السكة
وأهيم عشقا بالأعلام . ورجاله . ولا مؤاخذة نسوانه
ولولاهم
ماكنا عرفنا .. ولا أتنورنا
ولا أتثقفنا كمان
وأكره
بلادة المصريين
وقصر نظرهم
من رفع أسعار
البنزين
والسولار
والغاز .. بتاع البيوت
والمية
وأكره قلة صبرهم .. من الأنقطاع اللى مستمر للكهربا
وأمقت
كلامهم الكتير
عن المواصلات
والزحمة
واللحمة
والعيال .. وأم العيال
والشغل
والبطالة
والتعليم
والدروس الخصوصية
وأبجنى تجدنى
والرشوة
والفساد
والمحسوبية
والملوخية
والرز .. أبو لبن
والمهلبية
والمهلابتية
والعيشة .. واللى عايشينها
وكأنهم لاعرفوا .. ولا يعرفون
أن الحكومة
هى بابا وماما
وأنور وجدى .. كمان
وأن العين .. ما يصحش
تعلى عن الحاجب
وتروح فين .. يا صعلوك
بين الملوك
والكبير كبير.. والنص نص
نص
ولامؤاخذة
الصغير .. ما نعرفوش
لموا نفسكم بقى
وأحمدوا ربنا
وبوسوا أيديكم
وش
وضهر
وبوسوا الواوا
كمان .. على رأى الست هيفا
وأن كان مش عاجبكم .. أشربوا من البحر
أو فضوها سيرة
وأكفوا خيركم .. شركم
وربوا .. عيالكم
وربنا يخلى كل الناس الحلوين
لينا ........
ويخلى الحكومة . ويجعله عامر بحسهم
ده اللى ما لوش كبير
بيدور له .. على كبير
واللى ما بينضربش على بطنه .. بينضرب على قفاه
واللى فاهم حاجة يقوللى
وحياة ..
أبوه ؟
