عمرك الحقيقي هو عمرك الداخلي ، هو ما تشعر به ، وليس مجرد رقم .

الي كل شاب .. في ما بعد سن الستين .. أنت تكتب عنوانا لنهايتك .. دون أن تشعر.

ماتعملش فيها وحش .. شايل أنبوبة البوتاجاز لوحدك ، أو بتجري ورا الأتوبيس .. عشان تثبت إنك لسه عصب ؟

غضاريفك دلوقتي بقت زى البسكويتة . حركة واحدة غلط مش هتعمل شد عضلي . دي هتعمل انزلاق غضروفي . يقعدك سنة في البيت .

شغل دماغك .. مش عضلاتك .

الكرش مش وجاهة ولا عز .. ده قنبلة موقوتة . في كل المصايب ، ده مخزن التهابات بتسد شرايين القلب وبتعمل نهجان طلوع السلم .

مش فاكر كنت عايز إيه. .

المخ مش حرمان . . ولا هو رفاهية نستغنى عنه عند الكبر . وبلا وجع دماغ . لازم تنشطه بالقراءة والكتابة وزيارة الأهل والأصدقاء والسفر والمشى .. علي قد ماتقدر .

بتقضي يومك شاي وسجاير وتيجي بليل تتعشى تقيل؟ أنت كدة بتعمل تسمم غذائي لنفسك .

الحرق عندك بالليل بيبقى صفر، الأكلة دي هي اللي بتخليك تصحى الصبح جسمك مكسر .. وكأنك كنت بتتضرب علقة. ولا مشارك في ماراثون . وأنت علي الله حكايتك .

بتقول أنا طول عمري زي الفل ومش بتاع دكاترة ..  وبتعتبر إنك لما متكشفش.. فأنت كدة صحتك كويسة ده علامة تراكم مشاكل.

الضغط والسكر في السن ده بيبقوا حرامية بيدخلوا من غير استئذان . الكشف الدوري  صيانة وقائية .. وعمر فوق عمرك .

عشان متصحاش في يوم تلاقي المكنة وقفت فجأة . وربنا يكفيك شر وقفها .

العزلة في سنك ..  سم قاتل للمخ .

قلة الكلام والتفاعل بتسرع بظهور ألزهايمر وبتهبط المناعة . انزل، اتمشى . قابل صحابك . واتكلم .

أنا كبرت خلاص ..

بطلت تهتم بلبسك أو شعرك أو وزنك وبقيت بتقول خلاص راحت علينا؟

لما بتهمل شكلك .. نفسيتك بتقع ومعدلات الحرق بتقلب لصفر . اهتم بنفسك . البس شيك .. واتشيك. . الأناقة هي أول خطوات الصحة النفسية .. قبل الجسدية .

أنت مش في خريف العمر ..  أنت في بداية الشباب الصادق .

يا إما تحترم جسمك ويشيلك . يا إما تهمله وتصرف شقا عمرك على الدكاترة .

شيخوختك زى الحب .. لا يمكنك اخفاؤها ..

إلا إذا .
---------------------------------
بقلم: خالد حمزة
[email protected]