أيوووه .. إحنا شعب شكاي بكاي . علي كل صغيرة وكبيرة . ومن لا يشكر الحكومة التعبانة الشقيانة .. لايشكر والعياذ بالله .. ربه.

أيوووه .. إحنا شعب بيتبطر علي النعمة، ولا  يذكر ما توفره له الحكومة من خدمات ومواصلات ومياه وصرف صحى وكهرباء وغاز و و و و .. وهلم جرا .

أيوووه .. إحنا شعب مبيطمرش فيه أي إنجاز ولا بيحمد ولا يشكر . وهو يرى في كل لحظة كوبرى أو طريق جديد. واكبر مأذنة وبرج أيقونى ومتحف كبير يتحدث عنه كل العالم .. وساعة كبيرة فشر ساعة جامعة القاهرة وأعظم .

أيوووه .. إحنا شعب .. لايعمل بنكلة توحد الله .. وقاعد ينظر علي الحكومة ليل نهار .. تعملي ده ومتعمليش ده . ومنتظر مرتبه اخر كل شهر .. وبرضه مش نافع .

أيوووه .. إحنا شعب يطالب أهله بعد أن بلغوا أرازل العمر .. بتحسين معاشهم وعلاجهم .. ولايحمدون الله ويشكرونه علي أن دولتهم حفظها الله .. تعطيهم معاشا وتوفر لهم الدواء . وهم لا شغلة ولا مشغلة .. متهنيين علي الآخر .

أيوووه إحنا شعب.. لا يستحق حكومته .. التي لا تدخر وسعا في سبيل رخائه ورفاهيته .. وخد عندك مدن العلمين وكل الساحل الشمالي الغربي .. والقادم أفخم .

ولا جزر الكناري في أبهتها .

أيوووه .. إحنا شعب لا يرى الإنجازات هنا وهناك .. واللي ميشوفش من الغربال أعمي وأطرش ومابيحسش كمان .

أيوووه .. إحنا شعب عاش عقودا من الإنكسارات والإخفاقات والنكسات والأوهام وأحلام اليقظة ..  صابر ومستني الفرج من عند الله .. وبرضه مش نافع .

أيوووه .. إحنا شعب يعاني الأمرين في تدبير لقمة عيشه من ساعة ما يصحى الصبح .. الي أن يتولاه الله بنعمة وفضل من عنده .

أيوووه .. إحنا شعب لا تستحقه حكومته .. التي أكلت كل الأخضر واليابس .. وتركته علي الأرض .. والأغلب .. تحت الأرض .

أيوووه .. إحنا شعب مصر .
-------------------------------
بقلم: خالد حمزة
[email protected]