البستان
(البستان مليان أشكال وألوان اشي حكم وأمثال واشي موال واشي وهم وخيال)
* أيمن ونس يتراجع عن الاستقالة ، والثقافة والآثار "ودن من طين وودن من عجين"
- الجمهور يطالب بتغيير أشرف الخمايسي ويسري حسان يشوط على ليلى علوي
سيداتي أنساتي سادتي ، السلام عليكم ورحمه الله وبركاته؛ ننقل لكم مبارة كرة القدم بين فريقي المتشددين والتنويرين على الأضواء الكاشفة باستاد أرض التكفير الدولي، وزي ما إحنا عارفين؛ فيه حالة شحن وطحن ومحن بتميز لقاء اليوم .. اذّكر حضراتكم بالماتش اللي فات واللي كان مقرر يتلعب على أرضية ملعب مقابر السيدة نفيسة والإمام الشافعي بس للأسف المقابر اتهدت وبقت كوم تراب، وده طبعا للصالح العام .. حد من الجمهور بيسألني إيه هو الصالح العام ؟ أقوله هنعمل كوبري! ثم فيها إيه يعني لما شوية مقابر أثرية بقالها 1000 سنة تتهد؟! .. ماتش اليوم معقد، وكل فريق قافل على نفسه، وواضح اننا هنشوف مفاجآت في اللقاء واللي كان مقرر يحضره أحفاد أمير الشعراء أحمد بيه شوقي، واللي قال: سلا مصرَ هل سلا القلبُ عنها أَو أَسا جُرحَه الزمان المؤسّي؟. بس طبعا أحفاده رفضوا الحضور. بينورنا في الاستوديو أحفاد شاعر النيل حافظ إبراهيم واللي قال: أَنا إِن قَدَّرَ الإِلَهُ مَماتي لا تَرى الشَرقَ يَرفَعُ الرَأسَ بَعدي. لكن الشرق رفع راسه، وهدد بهد قبره، وللأسف أحفاده برضوا زعلانين .. بس بصراحة ملهومش حق .. دا المثل بيقول (الحي ابقى من الميت)! طبعا كل مشجعي د.طه حسين ماليين المقصورة الرئيسية ومنورين اللقاء؛ لانهم من فترة عملوا حرب فيس بوكية لإنقاذ القبر؛ بس مقدروش ينقذوا العقل، ويخلوه يفكر إزاي يستفيد من الآثار؛ مش مجرد موقف يسجلوه ودمتم. طبعا منورنا في المقصورة الرئيسية ضيفة الشرف وزيرة الثقافة، واللي مش عارفين هي بتعمل إيه أصلا؟ ولا إيه دورها؟ ولا إيه موقفها؟ وكله على (بركة الله يا جماعة) واديها سندوتشين! .. أنا شايف وزير الآثار قاعد جنب وزيرة الثقافة وكله (ودن من طين وودن من عجين) وبصراحة الجمهور محملهم فوق طاقتهم، ولجل ما نريحهم ياريت يقدموا الاستقالة؛ كفايا تعبانهم معانا مابين هدم قصور، ومقابر، ودا بصراحة مجهود جبار فوق طاقتهم.
هيبدأ اللقاء بالنشيد الوطني لشاعر النيل حافظ إبراهيم:
وَقَفَ الخَلقُ يَنظُرونَ جَميعاً
كَيفَ أَبني قَواعِدَ المَجدِ وَحدي
وَبُناةُ الأَهرامِ في سالِفِ الدَهرِ
كَفَوني الكَلامَ عِندَ التَحَدّي
أَنا تاجُ العَلاءِ في مَفرِقِ الشَرقِ
وَدُرّاتُهُ فَرائِدُ عِقدي
انتهى النشيد الوطني للفريق التنويري، وطبعا الموسيقى، والمعازف حرام؛ فما فيش نشيد وطني للفريق المتشدد. أنا شايف حد من الفريق إياه شمتان، وسامع حد من الجمهور بيقول: أحسن، وحد تاني بيقول: هو أصلا زيارة القبور حرام! وطبعا كل الكلام ده (اوفصيد واللينز مان) رفع الراية. أنا شايف دكة البدلاء بتطالب اتحاد الكورة بالاحتفاء برموزنا، وأحياء ذكراهم، والإبقاء على القبور، والقصور، وتطويرهم بدل من هدمهم .. قام حد من دكة التنويرين، وشاور للجمهور يهدا شوية؛ الماتش لسه في بدايته يا جماعة؛ دا فيه سواد جاي .. وبعدين التغييرات دي كلها من أجل الصالح العام .. لو نفتكر مع بعض عوامات الكيت كات؛ ناس كتير وقتها اثارت بلبلة، وقالت ليه كده؟ وإيه الهدف؟ لكن الهدف جه في مرمى المعارضة لما عرفنا ان العوامات هتبقى غرف للميتين؛ قصدي للمشجعين في نهائي كاس العزاب الدولي .. دا غير القصور والفلل اللي بتتهد في كل ربوع مصر، وده برضه من أجل تطوير البتنجان، وتقوير الكوسا، والمحشي كمان. خطة الفريق التنويري هتبدأ بشوية حلول على شوية أراء على حبة مقترحات، والحمد لله اترفضت .. فريق ولا ليه أي لزمة! .. أما خطة الفريق المتشدد هي النزول لأرض الميدان، وعمل جولة دعوية رعوية لتوسيع دايرة التشدد، وهي هي نفس المهلبية .. الفريق المتشدد عاوز يحسن موقفه في دوري العنصرية؛ خاصة ان الفرق الارثوذكسية كسبت الماتش اللي فات وقربت من المنافسة .. الماتش معقد ومقفول، وكل فريق محضر خطط خارجية وداخلية، والقيادة الفنية الحمد لله آخر ملوخية؛ لكنها طول الوقت بتحاول تعبر بالفريق لبر الأمان، والرز أبو لبن كمان .. الفريق التنويري بيحتل المركز الثالث، والفريق المتشدد بيحتل المركز الرابع، والفريق الأكثر تشددا بيحتل المركز التاني بعد ما كسب دربي العنصرية؛ وعموما هي مش فارقة كتير كله في السواد.. ولا حد بيفكر في بحث علمي، ولا تعليم، ولا التنوير .. وكل الأمور على الفيس بوك عبارة عن (دي راحت، ودي جت، ده رجع وده راح، دي أعلنت ودا اعلن، دي فتوة، ودي وعظة، ودي خطبة) .. وزي ما قال عم أحمد فؤاد نجم (كله منهو بفتوتين) والحدق يفهم .. لكن برضه بصراحة مش عاوزين نحمل إدارة النادي فوق طاقتها؛ بناء ستاد جديد أمر مهم جدا؛ لدرجة تخلينا نضحي بأثار، واقتصاد وسياسة النادي الداخلية، والخارجية كمان .. ومش مهم الأعضاء يتنفسوا، ولعلم حضراتكم الفكرة دي اتعملت زمان في العصور الوسطى؛ ما دول برضه كانوا معاتيه وآخر جنان.. وقتها اتفرضت ضريبة على الهوا .. يعنى عشان تتنفس تدفع ضريبة !! .. والهوا ملوش دوا .. ونزلني المحطة الجاية، والغي رحلتي .. الكورة راحت للكاتبة الكبيرة صافي ناز كاظم، واللي أعلنت عن بيع مكتبتها، وشاطت الكورة خطفتها الصفحات التنويرية، وبدأت حملة تصفية حسابات وهاتك يا ردح .. المشكلة بدأت من زمان لما كاتبتنا الكبيرة سابت نادي اليسار، وراحت في فترة الانتقالات الشتوية للفريق المنافس، وكله نسى وتناسى رغبة اللاعبة! هي حرة يا جماعة .. مش هي دي الحرية ولا إيه؟! .. وشاطت جت في القائم .. ارتدت للتنويرين .. خطفها منه ابن الشيخ يعقوب، ومسك الحديدة بعد ما والده انتقد البدلة .. ابنه غزله، وقال عادي، وهدف بنيران صديقة .. سنتر التنويريين .. وقف على كورته ووزع .. راحت للونج اليمين .. عدى منه وفات من التاني .. قطعها المتشدد .. وادها مرة تاني لابن الشيخ يعقوب .. دخل عليه الباك التنويري وخطفها .. وقاله يعنى المايك والتصوير حلال، والبدلة هي اللي حرام! وشاط .. حرام جت في العارضة .. يا الله على الماتش .. راحت للخمايسي، واللي غزل نجيب محفوظ وقال عنه كاتب عادي؛ بلا نوبل؛ بلا اوبل! .. وهدف بنيران صديقة محدش أحسن من حد .. أنا شايف تبديل الجمهور بيطالب بخروج الخمايسي .. الخمايسي لعيب مهم؛ لكنه مثير للشغب .. صحيح صاحب رؤية وفكر وله لمسته لكنه محسوب على الفريقين! .. سنتر المتشدد .. باصاها على اليمين رماها في الشمال، وقال استخدامنا المايك والكاميرا ضرورات، والضرورات تبيح المحظورات، وهدف التقدم للفريق المتشدد .. هدف (استروبيا) لكنه من الأهداف اللي بتعجب الجمهور .. الجمهور هيتجنن .. سنتر التنويريين .. وخدها يسري حسان عدا من الجميع، وفات وماشي الله عليك، وشاط الكورة عند ليلي علوي، وقالها يا فنانة إيه علاقتك بالمسرح؟ .. ليلى اعتذرت عن التكريم، وهدف التعادل بأقدام "حسان" الله عليك .. أنا شايف خطة المدير الفني للفريق التنويري ملخبطة لازم يحصل تغيير في نص الملعب .. يعني .. بصوا على الفرق التانية هجوم مسيحي منظم على الصفحات الفيس بوكية .. بيقابله تخطيط منظم للسلفيين برضوا على الصفحات الفيس بوكية .. هي دي الفرق اللي محافظة على مستواها .. وبيطلق حكم المباراة "زمارة" انتهاء الشوط الأول، ونذهب إلى الاستوديو التحليلي
أعزائي المشاهدين
انتهى الشوط الأول بالتعادل الإيجابي بهدفين لكل فريق
جالنا خبر هيقلب الموازين ميرفت الشعراوي رجعت لفريقها
وفي المقابل مدير نادي أنا مع نفسي حامد عبد الصمد ظهر في صفة كروية مع مدير نادي أنا ضدهم وشكلنا هنشوف تعاون جديد، والدوري هيولع .. وربنا يرحمنا منكم كلكم.. نرجع للماتش
يطلق حكم المبارة "زمارة" البداية
راحت لأستاذ التصميم العمراني أيمن ونس، واللي قدم استقالته، وحط الكل في ورطة، نبأ عاجل .. أيمن ونس تراجع عن الاستقالة عين العقل .. إحنا محتاجين هدوء .. عشان نعرف نشتغل .. أنا شايف شغب كبير من الجمهور، وشماريخ بتتضرب، والأمن نزل .. وفي هذه الأجواء يطلق حكم المبارة "زمارة" نهاية الماتش، والسلام عليكم ورحمة الله وبركاته، ونلقاكم في كوبري .. عفوا في مباراة جديدة وإلى لقاء.
-------------
البلاتوه
* المهن الموسيقية حلقت للفنانة سارة زكريا وبنت شريف منير حلقت للجمهور
- رقص فتاة النوبة وتوبة عمرو مصطفى ودقي يا مزيكا
البلاتوه هيجننا يا خلق يا هو والكادر الان قلقان داخل زوم إن على الفنانة سارة زكريا، والتي صدر منها بعض التجاوزات في حفلتها الأخيرة بالساحل الشمالي فأصدرت المهن الموسيقية برئاسة الفنان مصطفى كامل قرارا بوقف التعامل معها، ومن الجدير بالذكر ان الفنانة سارة زكريا صاحبة أغنية تيجي نتجوز بالسر، ونروج لبيت بعيد (وبيبي) أنا عن نفسي موافق!.
كما أصدرت النقابة قرار بوقف مؤدي القلقاس؛ عفوا مؤدي المهرجانات "كزبرة" ولذلك لما صدر منه من تجاوزات .. تخيل بعد محمد فوزي ومحمد عبد الوهاب وعبد الحليم حافظ ومن بعدهم على الحجار ومحمد منير وعمرو دياب وغيرهم .. يتصدر الغناء في مصر؛ شطة وكسبرة، كمون، وبهارات، وكماشة، ومنشار، وشاكوش .. وطبعا هتتنوع الحفلات ما بين المطبخ والورشة.
***
البلاتوه هيجننا يا خلق يا هو والكادر الان قلقان داخل زوم ان على بنت الفنان شريف منير والتي ظهرت على السوشيال ميديا بدون شعر! مما عرضها لحملة انتقادات واسعة؛ ليخرج علينا والدها ( ويبث لايف) ليرد على كل المنتقدين .. والوقت وبالبلدي كده هسأل عزيزي المتدين بطبعه شوية أسئلة ..إيه هي الحرية؟ ماهي الحرية؟ أين البشر التي رقت قلوبهم؟ أين العفو؟ أين الرحمة؟ هل من التدين السب والقذف؟ رد أنت على نفسك.
بالمنسابة اللي حصل مع بنت الفنان شريف منير عيب .. عيب قوي، ونفس العيب ده حصل مع فتاة النوبة، والتي عبرت عن فرحتها في حفلة تخرجها .. يستحيل تكون كل الشتايم دي تخرج من متدين بطبعه!.
البلاتوه هيجننا يا خلق يا هو والكادر الان قلقان داخل زوم ان على الفنان عمرو مصطفى والذي قرر العودة للتلحين مرة آخرى شكله تاب عن الغنا ودقي يا مزيكا
--------------------
فوق البيعة
* من المتحف للمحجر يا قلبي لا تحزن
فوق البيعة مصطلح لم يعد له وجود ولكنه رجع تاني عشان يقولك عدد المحاجر في مصر تقلص من 3 آلاف إلى 180 والسبب هو الرسوم والتكاليف وبقينا فوق البيعة نستورد الرخام .. ولكن دي تصريحات قديمة شوية وبتجدد ولازم فوق البيعة نقول ان السيد الرئيس قاد حملة موسعة لتطوير منطقة شق الثعبان وتحويلها لمنطقة صناعية عالمية.
----------------------------
من المشهد الأسبوعية
