أنا مغترب والاغتراب
قطعة حقيقي م العذاب
عايش وحيد في غربتي
مقفول عليا ألف باب...
ماشي وحيد في سكتي
لا معايا أهل ولا صحاب
كل ما تبعد خطوتي...
الشيب بيفترس الشباب
وكل لحظة ف وحدتي...
أجزائي موتها الغياب..
وشمس عمري بتختفي
بين الغيوم بين الضباب
واقول كفاية لابد أعود
يوصلني من بلدي جواب
الواد عاوز تابلت ولاب
والبنت طلبوها الخطاب
والشقة ضاقت ع العيال
ورصيد بينقص م الحساب
أرجع أقول أصبر سنة
من بعدها ألقي الهنا......
ألقي السنة جرت سنة.....
وألقي كمان القلب شاب
---------
حجاج فراج
