09 - 08 - 2022

شبه مختلف| حزن الختام .. في محبة حنان كمال

شبه مختلف| حزن الختام .. في محبة حنان كمال

(1)

مقطع أول

أم حمزة ونور وسارة

ياحبيبة قلب مصر

ألف ألف لاباس عليكي

بكرة هتجيبي البشارة

والبشارة يعني نصر

ضحكة بتنور عنيكي 

ياسمارة يا أم سارة

البراءة والطهور يا أم نور

والكلام اللي إحنا قلناه للتلامذة

بكرة ترجع أم حمزة 

تقرا سورة العصر بدري

في الكنيسة

بعد ماتصلي علي خير الانام

عند جامع ستنا الغالية نفيسة

يا إلهي ياللي عارفنا غلابة

قلت ادعوني ودعواكم مجابة

إشفي كل مريض بعفوك 

النسا قبل الرجال 

رحمتك ياكريم ولطفك

بالبنية حنان كمال

"اغسطس ٢٠١٤"

(٢)

مقطع آخر

صباح الخير يا ست حنان 

ياواخدة الفرحة و مسافرة 

وسايبة في القلوب حفرة

وقاصدة تغيري العنوان

* * *

صباح الجنة قدامك

وصف ملايكة خدامك

مع العدرا هناك عيشي

وسيدنا المصطفى إمامك

(٣)

مقطع أخير

ورسيت مركبك ياحنان

على البر اللي رايحاله

هناك رحمة وسلام وأمان

نعيم بعد الشقا وحاله

(٤)

فاصلة

ولاء بتموت ياسيدنا البيه

وابوها مش في جيبه جنيه

واخوها هناك على الجبهة 

بيلعب جوة عبه الفار 

ويسأل هو ليه سابها

وهم يجيبه ويوديه 

هيعمل إيه

   * * *

ولاء صرة محبتنا 

وتوب بيدفي جتتنا

ولاء في الحزن ضحكتنا

ولو ماتت هنضحك ليه

     * * *

ولسة ولاء بتتنفس 

مكان الجرح بتحسس 

بتصرخ آااه ياخلق ياهوه

ولسة عضو في المجلس 

بيسأل يا ولاء فيه إيه

   * * *

ولاء تعبانة في الإنعاش

ومين هيرد فيها الروح 

وكل الموجودين أوباش 

ومش كل الكلام مسموح

كلامنا المر بنخبيه
-----------------
قصيدة: على ابراهيم

مقالات اخرى للكاتب

شبه مختلف | أقباط كرة القدم!!
اعلان