ابسط ياعم جه اليوم اللى فيه حكومتنا الرشيدة هتدلعنا وتشخعلنا بعد صبر وطول انتظار!! علشان تعرفوا إنها حطانا جوه قلبها الحونين احياء وأمواتا .

تصدق يامؤمن الحكومة بتفكر فى مستقبلك ومش ناسية حتى يوم دفنتك ورقدتك الأبدية، وقررت إنها توفر لك مقبرة ٤٠ متر بالتمام والكمال ، علشان تاخد فيها راحتك انت وكل أفراد اسرتك الكريمة بعد عمر طويل إن شاء الله.

اوعى تفتكر لاسمح الله إن الحكومة فرحانه إنك هتغور فى ستين داهية، وهتريحها من رذالتك ورخامتك وطلباتك اللى مابتخلص ..لا ابدا ..الحكومة حطاك جوه عنيها حيا او ميتا . 

وعلشان اؤكد لك بالدليل القاطع مدى اهتمام حكومتنا الغالية بيك كمواطن وانها مهمومة برقدتك ويوم دفنتك.

خد المفاجأة دى ياسيدى : هيئة المجتمعات العمرانية، طرحت على المواطنين حبايبها وننى عنيها من جوه حجز 1017 مقبرة جاهزة  بمدينة 6 أكتوبر وضواحيها، بمساحة 40 مترًا للمقبرة.

اهه..شفت يامعلم ..أكيد مزأطط ، وهتطير من الفرح ، والدنيا كلها مش سيعاك .

وعلشان أبسطك كمان وكمان ، واخليك تشد فى شعرك من الفرحة ، سعر المقبرة بكلام فاضى ب١٢٧٠٠٠ جنيه بس ، يابلاش ياولاد !! يعنى مايجيش تمن مترين فى التجمع ، بذمتك يامؤمن شفت دلع أحسن من كده!!

وهيتم إضافة 5 آلاف جنيه مصاريف صيانة وحراسة علشان تعرف إن الحكومة مش سايباك حى أو ميت ، وإنها مش عتقاك ..وراك وراك ..هتروح منها فين !!

وحاجة كده على الماشى لازم أفكرك بيها من باب الاحتياط: ماتعملش عبيط وماتنساش تسدد 1.5 فى المائة مصاريف إدارية ومجلس أمناء ، ماهى الناس المحترمة دى مش هتستحمل غلاستك ورذالتك حتى وانت ميت ولازم تراضيها !!

ولعلمك الموضوع مش هيمشى سبهلله كده ، اوعى تفتكر إن كل من هب ودب هياخد مقبرة ، لا ياحبيبى ، دا هيئة المجتمعات العمرانية الجديدة ، هتخصص المقابر بنظام القرعة العلنية لمن تنطبق عليهم الشروط ، وسيتم تسليم المقابر للفائزين !!! ..شفت عدالة وشفافية أحسن من كده!!

ولو ربنا كرمك وفزت بالمقبرة، وحياة أبوك ياشيخ، ماتبقاش بخيل وشهيص نفسك واللى حواليك، واعمل بارتى لذيذ بالمناسبة السعيدة دى، الدنيا مش مستاهلة كآبة، وكفاية إنك هتلاقى حته تتدفن فيها وتمدد فيها رجليك ..بس خللى بالك هتعمل نفسك واد فتك، وبرم، ونفسك الأمارة بالسوء توسوس لك، وتقولك ياواد هو انا لو معايا ١٢٧٠٠٠ جنيه ماكنت اشتريت شقة اتلم فيها أنا وعيالى، وحياة أمك الغالية هندفنك فى مقابر الصدقة دى لو لقينا ليك فيها مكان اصلا .

خليك لذيذ وحلو كده، وطلع اللى تحت البلاطة، وربنا يكرمك بمقبرة تليق بمقامك ...وماتنساش تدعى للحكومة الغالية .
-----------------
بقلم: محمد عويس