الرياضة وكرة القدم تحديدا حاجة حلوه أوى ..يمكن هى الحاجة الوحيدة فى بلدنا اللى مجمعة المصريين حواليها، السياسة بتفرق الإخوة والأصدقاء، والكوره بتجمعهم .
روح قهوه بلدى وشوف المصريين وهما بيتفرجوا على ماتش لمنتخب مصر.. هتلاقى هناك كل فئات المصريين: الغنى والفقير ،العامل الشقيان والمهندس والدكتور والموظف البسيط.. حالة من المزاج العالى: اللى بيشرب شاى بالنعناع او بيمزمز فى كوباية حلبه حصى من اللى قلبك يحبها، واللى مغرم بالشيشة وبيضرب حجرين معسل.. وفجأة لما القهوة تتحول لفرح بلدى.. والكل بيرقص وبيحضن فى بعضه، والبسمة والضحكة الحلوة تترسم على الوشوش الشقيانة، هتعرف على طول إن منتخبنا جاب جون!! .. هى دى الرياضة .. فرحة وبهجة وسعادة وأخلاق، وعمرها ماكانت حقد وبغص وصراع ..الرياضة ..انتصارات وانكسارات وهى دى متعة الرياضة .. الرياضة حماس وحب وانتماء، وهنروح بعيد ليه .. المصريين اللى ليهم واللى ملهمش فى الكوره، بينتظروا بفارغ الصبر ماتش محمد صلاح مش ليفربول!!، لأنهم شايفين فيه المستقبل، وإنه الحاجة الحلوة اللى بتفرحهم وبتديهم أمل فى بكره.
أنا شخصيا اهلاوى صميم لكن عمرى أبدا ماكنت متعصب .. جيناتى أهلاوية الهوى .. وتقدر تقول كده إن الاهلى بالنسبة لغالبية المصريين حب وعشق وحياة، دايما مفرح ومجمع الأحباب .. بيطلع الهم والاكتئاب اللى معشش فى كل زاوية من زوايا نفوسهم المتعبة الحزينة.. الناس عاوزه تفرح وتنبسط، والاهلى هو صانع البهجة والسعادة .. هو اللى ممكن يخرجهم من المود المهبب والضغوط النفسية الرهيبة، وإلا هيكون مكانهم الطبيعى سرايا المجانين ..علشان كده الاهلى مش مجرد كيان رياضى وبس .. الاهلى مؤسسة علاجية لعلاج ونشر البهجة فى نفوس الملايين من المصريين المتعبين المرهقين..
وانا متأكد أن الزملكاوية عندهم نفس الأحاسيس والشعور والحماس لفريقهم .. بيحبوه ويشجعوه بكل ذرة فى كيانهم .
اللى عاوز اقوله إن الحب والانتماء لايمكن أن يتحول لبغض وكره وتعصب .. الرياضة عمرها أبدا ماكانت ساحة للمعارك وتراشق بالالفاظ النابية .. للاسف بعض رؤساء الأندية اللى مفترض فيهم يكونوا هم النخبة والقدوة بيجروا الجمهور لمعارك تافهة لمجرد الظهور والشهرة .
ورغم إنى اهلاوى صميم إلا أننى سعيد جدا بظهور فريق زى بيراميدز على الساحة الرياضية، لان المنافسة كانت محصورة بين الاهلى والزمالك، وده مش فى صالح الكرة المصرية .
هاكون سعيد بكل تأكيد ، لما تكون فيه منافسة قوية والاهلى ياخد بطولة الكاس اوالدورى، ولن اشعر بطعم ولذة الانتصار لما تكون المسابقات الرياضية هزيلة وضعيفة.
ظهور فريق مثل بيراميدز مكسب كبير للاستثمار الرياضى والكرة المصرية، وده مش تطبيل لانى عمرى ماعرفته، احنا عاوزين عشرات الفرق زى بيراميدز لأن الفرق من النوعية دى هتشعل المنافسة بين الفرق وهترتقى بمستوى الكرة المصرية فى المحافل الدولية .
لكن ومع ذلك انا مع تقليل اللاعبين الاجانب فى الفرق المصرية، لأن زيادتهم معناه سحب البساط من تحت اقدام الأندية الشعبية زى الاتحاد والمصرى والاسماعيلى الغير قادرة على مجاراة الصفقات الهائلة التى تجاوزت مئات الملايين والتى تبرمها الفرق الغنية .
المهم ياصاحبى ..سواء كنت اهلاوى او زملكاوى أو حتى بتشجع بيراميدز اوالاتحاد او الاسماعيلى او المصرى أو أى فربق آخر إنت بتحبه وتشجعه ، يجب أن تتحلى بالروح الرياضية.
-----------------------
بقلم: محمد عويس
